قصيدة : جواز عرفى

مدير عام المنتدى

جواز عرفى
شعر : محمد ضباشه

ليه يا بنتى جواز عرفى
الكلام ده جد ولا هزار
ويقولوا أيه أهل الحته
فاسده وجت لينا بالعار
دى ناقصه أدب ورباية
خلت أبوها ماعاد له وقار
دى فكرة خايبه ومجنونه
ومطرودة من كل الأفكار
جواز أغراء بلاش منه
حتى أن كسبتى بالقنطار
دهب وفضة وعفش مريح
هيساوى أيه فى شرف ينهار
والخوف لو مرة تنكشفوا
وللناس تبان كل الأسرار
وتبصى حواليكى ساعتها
ماتلاقى الا خراب ودمار
وتضيع كمان كل حقوقك
وتبقى بتلعبى بالنار
وحبيبك يهرب من حضنك
ويبان ساعتها أنه مكار
وهتعمل أيه ورقة معاكى
متلغمطة فى حبة احبار
الشرع قال دى جوازه حرام
ودى وسيله لناس أشرار
ما يعرفوا على فين رايحين
وهى خطوه تودى النار
وترجعى بايعة وقارك
ويبقى سجنك جوه الدار
وبعد فتره يتوه حلمك
وتلاقى دمع عنيكى أنهار
على حب عاش فى الضلمة
وجوازه مليانه بغبار
طب فيها ايه لو فكرتى
فى زفة ورقص بالمزمار
وأهلك من الفرح تزغرد
وأخواتك يعلقوا الأنوار
وأبوكى جايب المأذون
يكتب كتابك فيه أشهار
وأنت بالطرحة البيضا
وحواليكى صحبة من الأزهار
ياريت تفوقى من وهمك
قبل الحكاية ما تبقى قرار

» قصيدة حطة يا بطة
» قصيدة / كم قلتها
» قصيدة طوابير
» قصيدة :يا نسمة
» قصيدة بحبك