بنلف حوالين بعض

مدير عام المنتدى

بنلف حوالين بعض
شعر : محمد ضباشه

بنلف حوالين بعض
فى دواير ما بتنتهيش
ودوامات بتاخدنا بعيد
ونرجع بايه مافيش
زى شبك الصيد
خيطانة ما بتعديش
أى سمكة تدخل
مكتوب عليها تعيش
خارج حدود مكانها
وتدور ما تلاقيش
مره نتعب ونقعد
وننادى عليها ما تجيش
يا دنيا افتحى بابك
وكفايه ما تضحكيش
ضاق الخناق علينا
والصبر ما بيكفيش
والأمل غابت شموسه
عدى ولا عرفنيش
ولا سمع ندانا
ولا خيط بيده الخيش
اللى داب من همومنا
وفى نظره ما نساويش
ولو حتى بصله
ولا ربع قرش حشيش
نتوه معاه فى ليله
ولو انه ما بينسيش
ونقول البانجو أحسن
وأهات ما تتحكيش
نقعد بس نهلوس
فى ايه ما تقوليش
مرة على نكته خايبه
أو على شكل الواد عليش
أو على الواد بشندى
لما مسكة الشويش
او على اللى ضحكوا علينا
او على السرقه والتهبيش
اه محاوله لننسى
ونظهر على الأفيش
أسماء بلا هويه
ودواير ما بتتمحيش
بنلف ديما معاها
لما بقينا دراويش
نقول مدد يارب
أمتى بقى هنعيش
مع ناس فى الدنيا كدا
تاخد ولا بتديش

مدير عام المنتدى

نقول مدد يارب
أمتى بقى هنعيش
مع ناس فى الدنيا كدا
تاخد ولا بتديش