قصيدة ألوان باهتة

مدير عام المنتدى

ألوان باهتة
أجمل ما كتب : محمد ضباشه

تعالى يا صاحبى معايا نشوف
ألوان باهتة بقالها زمان
بشوفها كتير فى حتتنا
وبطلها للأسف انسان
لناس صاحية وناس نايمة
وناس للصح بقوا عميان
ضميرهم مات مع أخلاقهم
وحياتهم نرفزه وزهقان
تعالى بكاميرا نروح نرصد
صور شاذه تهد كيان
ونرسم صورة نحكيها
ونلون من الحياة الوان

أول حكاية وأنا ماشى
قابلت شاب واقف سرحان
الواد حليم أبن بهانه
بيلف بانجو مع الدخان
فى سيجارة دخانها مولع
وتايه فى الحياة توهان
واقف يزعق فى الشارع
وفاكر نفسة واد فنان
وعيونه حمرا زى الدم
من شكله بقيت قرفان
ومراته زهقت من عشته
واخواته زهقوا معاه قولان
وعيالة يبكوا لحد الصبح
وابنه يقوله يا أبويا جعان
ما البانجوا خلاص ضيع عقله
وزاد واحد على الادمان

وأوضاع غريبة فى حتتنا
شجار على الفاضى والمليان
بين الاسطى رشاد ونفوسة
باين عليها كان بخلان
وكل همة فى الخمرا
وكل ليلة يرجع سكران
يشتم ويضرب فى عيالة
ومراته تشكى من الحرمان
وتقعد تحكى مع جيرانها
على جوزها واللى صابه كمان
ينام يهلوس من تعبه
ودمى يغلى ولا البركان
لمين يارب اروح اشكى
وانت علينا اله رحمن

وراجل عجوز قوى مدلع
عامل تسريحة بشكل جنان
بيحب جديد على مراته
بت صايعة اسمها أحسان
ومراتة مشغوله فى بيتها
وهو فى الهوى هيمان
وأغانى حب على الكاسيت
وهو بيغنى معاها كمان
لا همة تلامذه بيذاكروا
ولا سامع نداء لأذان
وتقوله يا جدوا ما يصحش
يعمل نفسه مش فهمان
وكأنه شاب بن العشرين
فى الحب يا عينى ولهان

والواد حميدة على الناصية
لامم شله من الشبان
كل اللى ماشية يعسوها
دى بيضة وسمرا وجسم ملان
وان واحده وقفت قدامهم
فريرة يجروا وراها طيران
وكلام أباحة وبيجرح
وكأنهم من بيت خسران
وهى تدارى فى هدومها
وتقول منك لله يا شيطان

وحكاية فيفى الغلبانة
سالفة الموبايل من أشجان
وهات كلام تسمع منه
قابلنى يا روحى عند فلان
وفى الميعاد بقى يتقابلوا
وتقول تعبت من الهجران
ومره فى مرة تتعود
لا عاد كسوف ولا عاد خجلان
ونظرة لمسة ومسكة أيد
تروح فى سكة تضيع ضيعان
وترجع تقول فينه حبيبى
بعد ما زاغ منها زوغان

ولا الشباب ولعب الكورة
وسط الطريق والناس ماشين
وان خبطت ست معدية
يقولوا خلاص مش قاصدين
وزعيق وجرى فى الشارع
وكأنه نادى العاب فاكرين
وميه وسخة من البلكونه
حرام عليكوا الناس نايمين
بالطوب يردوا على الميه
وللأزار بالطوب كاسرين
وتقوم خناقة على الكورة
وكأنهم شله مجانين
وكل يوم بنشوف حكايات
يكتبنا ربنا مع الصابرين

وعجوزه عايشه بمفردها
فى قوضه يا دوب مترين
ما قدرة تعمل أكلتها
ما العمر عدى فوق سبعين
وعيالها عشرة بنسوانهم
تحلف تقول والله عايشين
من بعد أبوهم ما توفى
ولادى بقوا عليه قاسين
ما حد منهم يخدمنى
حتى الجنيه بقوا ماسكين
وابنى الصغير طال بعده
واخبارك غابت من سنتين
ساعات أخيب وأقعد أدعى
وأخاف لقلبى يرد أمين
وساعات أنادى ولاد بطنى
وأحبس دموعى جوه العين

وست فاضة فى حتتنا
تقعد تنادى على أم حنان
تنزل معاها عيال خمسة
تكسير وخبط فى البيبان
وجنب حيطة ويتلموا
وهات نميمة على السكان
فلانة زعلت من جوزها
مع ان جوزها شقيان
والبت سوكة هتطلق
علشان جوزها راجل خيبان
وأم سعيد ماكرة وصفرا
تقرص وتلبد كالتعبان
وأم سمير لابسة قميصها
فى البلكونه واقفة تمص لبان
والجارة دى مسكت جوزها
مع أم بطة مرات سمعان
ماسابوا واحده فى الحارة
الا وحطوا عليها قطران

وقلت مرة اركب أتوبيس
لقيته زحمة بناس مليان
كبير وطالع اتسند
على حد واقف من الركبان
والطرقه زحمة وحر شديد
برجل واحده بقيت وقفان
لاشاب عاوز ينده لى
ولا حد راضى يفضى مكان
وست محشورة فى الزحمة
كرمتها قدامى بتتهان
قلت يا اسطى نزلنى
قالى المحطة فى الدوران
جت المحطة ما عرفت أنزل
رمونى فى الشارع حفيان

حكايات كتيره لو أحكيها
تضيق صدركوا من الأحزان
على اللى داير فى بلدنا
وكأنه مس من الشيطان
وعاوزنا نرجع زى زمان
قول للزمان ارجع يا زمان

حكايات كتيره لو أحكيها
تضيق صدركوا من الأحزان
على اللى داير فى بلدنا
وكأنه مس من الشيطان
وعاوزنا نرجع زى زمان
قول للزمان ارجع يا زمان
===================
تصدق فعلا حكايات تعتبر مس من الشيطان
وتسبب اكتئاب .....ربنا يحفظنا من أمثال هؤلاء
تقبل مرورى وشكرى على عرضك لمثل هذه النماذج الموجودة بالفعل فى كل مجتمع
عرض رائع باسلوب سلس ومشوق
لك كل تحية
ماما فوفو وجدى
قصيدة ألوان باهتة 056

مدير عام المنتدى

شكرا ماما فوفو لتعليقك ومرورك الكريم وأتمنى ان تكونى فى احسن الاحوال

» قصيدة حطة يا بطة
» قصيدة :يا نسمة
» قصيدة بحبك
» قصيدة :غريب
» قصيدة : نصيبنا كده