النهاردة ايه ؟

مدير عام المنتدى

النهارده أيه

شعر : محمد ضباشه

الجمعة زى السبت
والحد شبه الخميس
والناس تايهه وحيارى
واليوم اصبح كبيس
لا نعرف ايه النهاردة
ومين هو العريس
ولا قادرين نفرق
الطيب من الخبيث
وناس وخلق ياما
وعساكر من البوليس
بيقولوا احنا الغلابة
ودمع العين حبيس
عاوزين حاجة ناكلها
أحسن ما نموت فطيس

الجمعة زى السبت
والاثنين وراه تلات
وأخبارنا هى هى
وكوارث بالمثات
بناكل أى حاجة
ونلبس من البلات
ونقول يا حيط دارينا
صبيان ويا البنات
ما خلاص ضاعت حياتنا
مش فاضل غير أهات

الجمعة زى السبت
وبعد بكرة اثنين
ووعود سمعتوهالى
من سنه واثنين
وحلقى لسه ناشف
وسلاسل فى الايدين
وتقولوا بكرة أحسن
طب هو بكرة فين
وأسعار فى نار بتغلى
وذادت فوق المتين
اليك يارب نشكى
وأنت يارب المعين

الجمعة زى السبت
وايام تجر أيام
ما أخذنا منها حاجة
غير حزن والام
وحلم مرة شوفته
وأنا نايم فى المنام
أن انا جوه قصر
حيطانه من الرخام
والناس مبسوطة خالص
ومفيش هناك زحام
ووسادة تحت راسى
باين من ريش نعام
وصحيت على صوت يقولى
يا بابا الساعة كام

</BLOCKQUOTE>
<BLOCKQUOTE> </BLOCKQUOTE></BLOCKQUOTE>

مراقب عام

بارك الله فيك
شعر في القمة

مدير عام المنتدى

شكرا لك اخ شريف على مرورك وتعليقك واتمنى ان تكون فى احسن الاحوال
تقبل تحياتى
محمد ضباشه

» النهاردة يوم الحساب
» مصر النهاردة بتتولد