رحلة شيخ البلد الى المعرب
يكتبها : محمد ضباشه
------------
طلعت فى دماغى فجأه أنى أسافر المغرب , فقلت لها يا أمى أنا هسافر المغرب ردت وقالت يا أبنى ايه بس اللى يخليك تسافر متأخر كده خليك للصبح النهار له عنين
رديت وقلت يا امى دى بلد اسمها المغرب ردت وقالت يا ابنى ما أنا عارفة انها بعد العصر بشوية وبعدها بساعة العشا صح أنت فاكر أمك هبلة
يا أمى انتىفاكرة انى هسافرللزمن مش للمكان , وهونت على نفسى مه أمى مش فاهمة ولا عارفه أنا حتى مسافر ليه
وعدى يومها بسلام , وتانى يوم من بدرى روحت على السفارة ووقفت فى طابور طويل وعريض فكرنى بطابور العيش فى حتتنا بس الفرق بين الطابورين ان دة ما فهوش زعيق ولا خناق
وبعد ساعات وانا واقف تحت المظلة جه عليا الدور فقلت للأخ اللى قاعد فى الشباك والله يا أخى أنا عاوز اسافر المغرب , فرد وقالى خير اللهم اجعلة خير , قلت له يا استاذ هو أنا بحكى حلم وانتى بتفسرة بقولك عاوز اسافر المغرب , رد وقالى طب وزعلان ليه بس نعرف انت رايح المغرب ليه , مقدرتش ارد , طب ارد أقوله ايه , يا سيدى رايح اتفسح , قال قول كده من بدرى وأعطانى ورقة فيها كلام مطبوع
خرجت من الطبور وجلست على كرسى بعيدا عن الشباك اقرأ البيانات المكتوبه وطلعت القلم من جيبى وخلصت كل البيانات ورجعت على الشباك لقيت طابور تانى وقفت لما جة عليه الدور ولما جة دورى الموظف قالى يا سيد قدم الطلب فى الشباك اللى جنبى
وزى كل مرة خرجت من طابور الشباك الاول الى طابور الشباك التانى وعدت ساعات ولما جة عليا الدور الموظف قالى عفوا يا سيد ميعاد الشغل انتهى من فضلك احضر باكر
وروحت البيت وكأنك يا أبو زيد ما غزيت ,وقعدت طول الليل أفكر
صحيح انا رايح المغرب ليه
وعدى الليل وانا صاحى بفكر والنهار طلع و لبست وخرجت علشان اروح السفارة تانى ووصلت الحمد لله من غير فطار ولا حتى شربت شاى ووصلت على الشباك بعد طول الانتظار المعتاد وقدمت الطلب وقالى الموظف هات جواز السفر بتاعك اعطيته له وقالى انتظر على الكراسى لما انادى عليك
ونادى علية الموظف كتر خيرة وقالى السياحة لازم تغير فلوس مصرى بالدرهم المغربى ولازم تكون التذكرة للمغرب ذهاب وعودة وحدد لى المبلغ اللى هبدله بالدراهم
واخدت الجواز وعليه التأشيرة سياحة للمغرب والسفر فى خلال شهر
بس المشكلة فى التذكرة ذهاب وعودة والمبلغ اللى هغيرة , طب انا عاوز ذهاب بس يمكن تعجبنى المغرب وأعيش هناك على طول
المهم دبرت المبلغ ,ورحت غيرت الفلوس المصرى بالدراهم من البنك وقلت ماعدش حاجة الا انى أقطع التذكرة وروحت بسرعة على مكتب السياحة وقلت له عاوز تذكرة للمغرب ذهاب وعودة فطلب منى الجواز وبدأ يكتب فى التذكرة فقلت له والله يا شيخ انا لية خدمه عندك قالى أأمر قلت له والنبى تحجزى كرسى جنب الشباك علشان أنا بحب اشم هوا الصبح قالى هو انت مسافر بالباص دى طيارة شبابيكها مقفولة , قلت له ازاى مقفوله المهم شرح الوضع اعتزرت له ما انا اول مرة اركب طيارة وما أعرفش وقطعت التذكرة وروحت على البيت ورتبت هدومى وبعض الاغراض الخاصة بى فى حقيبة صغيرة
وأمى قبل السفر بيوم أخدتنى فى حضنها وظلت تبكى كأنى رايح الجيش مش مسافر بلد عربى وكأنى رايح ومش راجع , المهم قلت لها يأمى وصيتك أخواتى وبنتى ولو مت يا أمى حلال عليكم ورك البطة وطبق المحشى بتاعى اللى فى التلاجة
ويوم السفر
صحيت أمى من بدرى ولقيتها قاعده تعمل سندوتشات علشان أخدها معايا اشى جبنة واشى بيض واشى لحمة قلتلها يا أمى هو أنا مسافر المغرب على جمل أنا هركب طيارة وفيها أكل , حلفت برحمة أبويا لأخذ الاكل معايا فقلت لها يا أمى طب كفاية عشرين سندوتش من كل نوع علشان حلفتى برحمة ابويا
وقبل السفر بساعات جم اخواتى يودعونى والدموع مليه عنيهم خلونى ابكى انا كمان وحسسونى انى رايح اتشنق مش مسافر , سلمت عليهم وحضنت أمى وركبت عربية لحد المطار ووصلت قبل ميعاد الطيارة بساعتين
وجلست بصالة المطار انتظر زى ناس كتير قاعدة وسألنى واحد قاعد جنبى انت مسافر أمتى يا بلدينا قلت له المغرب قالى يابنى العشا اذنت مغرب ايه بس قوم يا ابنى اسأل
روحت بسرعة قدمت الجواز لجوازات المطار وسألنى الظابط صحيح انتى مسافر المغرب ليه وكأنى رايح لسمح الله اسرائيل ولا دوله معادية لمصر , قلت والله منا عارف بس التاشيرة بتقول سياحة , قالى على بركة الله , واخدت ختم المغادرة وركبت الطيارة وانتظرت انها تتحرك فى ميعادها ولكن يا خسارة
الشنطة اللى فيها ملابسى والاكل اللى عاملاة امى نسيتها وانا بختم الجواز وقمت من على الكرسى وكان باب الطيارة لسة مفتوح نزلت جرى علشان اجيب الشنطة
وجريت على الشباك لقيت الشنطة زى ما هى ما فيش حاجة ناقصة منها اللبس زى ما هو والسندوتشات ماحدش كل منها حاجة شلتها وقلت ارجع الطيارة تانى قبل ما تطلع وانا داخل لقيت واحد بيقولى انت رايح فين
قلت له انا مسافر المغرب قالى فين جواز السفر , بدور فى جيبى مالقتش الجواز باين نسيته على كرسى الطيارة , اخذنى لمكتب التفتيش بالمطار وهات يا اسئلة لحد ما سمعت المذيعة بتقول ان الطائرة المتجهة للمغرب تقلع من ارض المطار الحين
فضحكت بصوت مرتفع ادهش كل الموجودين الى ان سألنى أحدهم لماذا اضحك فقلت جواز سفرى رايح يعمل سياحة فى المغرب وانا لسة فى القاهرة والسبب سندوتشات أمى
