ياريت نغير

مدير عام المنتدى

ياريت نغير
محمد ضباشه

ياريت ونفسنا كلنا
نشوف تغيير بجد
مش تغييروشوش
بسياسة نازله هد
وكل هدفها تضحك علينا
بوعود مالهاش حد
وترجع ريما لعادتها
ونلاقى السكة سد

مه لو عاوزين نغير
نبنى نظام من جديد
لا فيه من نظام مبارك
ولا فيه بتوع حديد
ولا فيه حاشية تملك
وبينا وبينهم بعيد
ولا فيه رئيس لمصر
فرعون بدماغ عنيد

عاوزين دستور جديد
بحكومة من البرلمان
وقانون يقدر يحاسب
الفاسد فى كل مكان
دستور مبنى بفكر
مش زى دساتير زمان
وكفايه ترقيع يا سادة
فى دستور خلاص أتهان

عاوزين نعيش فى مصر
يومين فى عيشه كريمة
نحقق فيهم أمالنا
اللى سرقوها ولاد اللقيمة
وسابونا عايشين نعانى
وأحنا بنية سليمة
ربطنا ميت حزام
وهمة سرقوا الوليمة

عاوزين مصر الجديدة
بعد ثورة يناير
فيها ديمقراطية وعداله
وحمام فى سماها طاير
فقيرها زى كبيرها
ما فيهاش ولا فرد حاير
مش لاقى قوت ليومة
وكاس المر داير

عاوزين نفكر بجد
وبلاش كلمة انا
خليها أحنا ونحن
نبنيها فى كام سنا
وبلاش ركوب الموجة
ونتشعلق على البنا
اللى بنوه شبابنا
ونقول أحنا هنا