كلنا فى الوطن اخوان

كلنا فى الوطن أخوان
شعر : محمد ضباشه

وبتسألونى أنا ليه مهموم
أقول لكم بصراحة زعلان
على اللى داير فى بلدنا
بين حنا وعبد الرحمن
مع أنهم أخوه وعايشين
ومقرهم نفس العنوان
وفى الثورة كانوا ايد واحده
وغسلوا اوساخ الأبدان
وكشفوا فساد ماله أخر
وهدوا عروش السلطان
وكان هدفهم نقول أحنا
ونبنى بأدينا الأوطان
ونقول لمصر مكانك أهو
عالى فى كل الأزمان
لكن يا خسارة فيه جماعة
هدفهم مصر تتهان
وأطماعهم نار بتدمرنا
وأكيد مجهزه لنا الأكفان
مع انها فاقدة الشرعية
وغاويه تدمير فى الصلبان
وحرق كنائس أخواتنا
وتشعلها فتنه كمان وكمان
والدوله عماله تداوى
وتقول كفايه يا أنسان
داللى بيرهب أخواته
ملعون فى كل الأديان
لاعندة شفقة ولا رحمة
وخلانا ما نحصد غير أحزان
ياريت نغيروا جواكم
ونطيع اله واحد رحمان
ونفهم اسلامنا كويس
ونعمل باللى مكتوب فى القرأن
وبلاش تعصب يرمينا
فى فرقة وأحنا عميان
ومصر ترجع تتخلف
ويقولوا مصر ما فيها أمان
مسلم مسيحى أيد واحده
وكلنا فى الوطن اخوان