يا أرض مصر
شعر : محمد ضباشه
يا أرض مصر أبلعى
ناس لسه بالفساد باقين
من نظام حكم ظالم
جرجرنا وراه حافين
مقيدين بسلاسل حديد
وخلانا على أرضنا مساجين
علشانه هو وحشيته
يحكمونا بقهرهم لسنين
بعد ما حكموا علينا بالخرس
علشان نكون ساكتين
ومغمضين عنينا عليهم
وهما فى البلد طايحين
من شرقها لغربها بيقسموها
على شلة الفاسدين
وهو حاكم ما عنده ضمير
قلب فى عقولنا الموازين
وخلى الحق بيطاطى
لظلم ما عنده دين
وخلى الكبير يكبر قوى
وخلى فقيرنا يومه طين
ولما فوقنا من وهمنا
وعرفنا هو مين
لقناه شخص ما يستاهل
يحكمنا يومين تانين
قلنا بسم الله
واتملت بنا الميادين
وطلبنا برحيل نظامة
وعليه لازم تتطبق القوانين
هو وكل أعوانه
اللى كانوا على البلد راسمين
والحمد لله حبسناهم
وعلى أرض الكرامة ماشين
رافعين راسنا لفوق
وبنتمنى كام سنه حلوين
نعشهم أحنا وولادنا
ونشم هوى الياسمين
وينوبنا حبه من خيرك
اللى سرقوه مننا الواطين
لكن ديول النظام باقيه
بتتحرك كما التعابين
هدفها تسرق منا فرحتنا
وعاوزينا نكون تابعين
وياريتهم حاشية تستاهل
وياريتهم على البلد خايفين
خديهم تحت رجليكى
وأرفعى مننا الغالين
يحموكى ويحموا ترابك
بعدل وأيمان ويقين
ويعود الحق لأصحابة
ويصحى اللى من يأسهم نايمين
ونقول مصر رجعت لنا
ورجعنالك نقول شاهدين
بأنك أجمل ورده فى الدنيا
وبنعاهدك نكون صادقين
فهل يستوى اللى باعوكى
مع اللى ضحى بكل غالى وثمين
ياله يا مصر أخسفى
ناس لسه للعمار كارهين
