لازم فى النهاية أبتسم
كلمات لـــ محمد ضباشه
كل الأمور أتبعترت على الأرض ليه
وان قلت ياله نلمها هتفيد بأيه
ما القاموس خلاص وقع أتقلب
يالا العجب
قلبى بيصرخ من التعب
وأنا شايف شايف كل كلمة ليها علاقة بفعلها
وأنا زيها بسأل نفسى مين السبب
وليه كلامنا من قاموسه اتشطب
وكل كلمة بتقرب من أى كلمة تشبه لها
بفتحها وبكسرها وبضمها
وبتدور على فعل ماضى كان معجب بها
معقول كل قاموسهم كان فساد
شيىء بأعتياد
ويا التربح والغسيل
قلت أكيد قاموسهم مش اصيل
دا مستحيل
اوعاك تميل
وتروح برجليك عندهم
خليهم فى سكة واحده لوحدهم
ما الأرض لسه مليانه كلام
وأنا فى السياسة محتاج علام
أرجع القط اللى باقى وافسرة
واللى قادر اغيره راح أغيره
لكن الحكاية أكبر من الخيال
وتغيره فى الوقت دا أصبح محال
اللى ظاهر حب سلطة قلت عديها
تزوير تربح قلت بردوا عديها
توريث قلت ما أنا ياما شوفت قبليها
والشعب نايم على الودان
ومفيش أدان
وبصراحة كل أمورهم مترتبة
وحياتنا رايحة جاية متشقلبة
أنا قلت أحسن حاجة دلوقتى السكوت
أحسن ما أموت
ورجعت تانى للمكان اللى قاموسهم فيه أتقلب
بعد ما عمرى اتسلب
وحاولت أفسر من جديد اللى باقى فى عهدهم
وايه اللى خدناه منهم
لقيت الباقى شيىء فظيع
وبلدنا وياهم قريب قوى هتضيع
وأنا بتعدم
من غير صرخة عليا أو ندم
فقمت ماشى على اللى باقى من الكلام ومشخبطة
ومسكت قاموسى بالمعانى ومظبطة
وروحت بمزاجى معاهم للميدان
ضد الحيتان
وفرحت لما لقيت شعارنا حروفة من دهب
وشهادة ميلادنا راجعة تانى تتكتب
وزعلت بردوا من كلامنا اللى فى قاموسهم أتشطب
وقلت الحكاية مش بسيطة
ولا الناس دى دايما كانت عبيطة
راح معانا يسلموا
وأتكلموا
لكن كلامهم كانت عناوينه البقاء
بس بغباء
من غير عناء
أو ولاء
أو فداء
وأفتكرت كلمة قتل كانت على الارض مرميه
باقية من قاموس ناس فاسدة وحرامية
وفعلا نفذوها بجد
وما سمعوا صوت لينا ولا مالى عنيهم حد
والنظام بعد الكلام اللى فى قاموسنا ما طلع اتهد
وأتشد شد
من رقبتة وطحنا بيه
ودلوقتى عرفنا كان سبب بقائة ايه
ورجعت أسأل كل الأمور أتغيرت على الأرض ليه
وأن قلت ياله نلمها هتفيد بأيه
خليها ذكرى
ونروح لبكرا
وبعد كام سنه نحكيها للعيال
جمعة غضب
ويا موقعة الجمال
وعلى العلم نرسم كل يوم صورة شهيد
زعلان أكيد
بس لازم فى النهاية أبتسم
وجوه الصوره أكيد صورتى هتترسم
