وكأنك يابو زيد ماغزيت
محمد ضباشه
لفوني بخمس ترغفة
ونص أزازة زيت
وتلات معالق رز
وقالولى بكدا عديت
قلت نفسي لعيالي في فرخه
دانا ياما عشانها سعيت
وشاركت والله في ثورة
وفى التانية ما اتغديت
لما أتنبح صوتي في هتاف
وعلى حال الغلابة بكيت
ونمت في برد الشتا
ووراها في الميدان صليت
ونسيت شغلى يومينها
وعشان البلد ضحيت
ما أنا عشت عمري كله
أهواها ما مليت
مع أن حكامها رموني
في فقرى لما أنا شكيت
بأني مواطن مصري
على نيلها لها غنيت
وأنفض منى الميدان
ولجسمي ما حسيت
وعدت شهور وشهور
راكب فقرى ما هديت
لحد وقفتى فى كمين
ولبرج العوز عليت
وكل ماسمع كلامهم
والله أنا أتشليت
لما قالولى في البلد
وكأنك يابو زيد ماغزيت
