على رأى المثل

مدير عام المنتدى

على رأى المثل
شعر : محمد ضباشه

المسئولين فى البلد دى شبعونا كلام
أن كان فى الجرائد ولا فى الأعلام
وأخبار منافقه وكدابه ولابسه قناع
توهمك انك فى سابع سما وانت فى سابع قاع
وياما ضحكوا على عقول الناس
بتصريحات ماليها فى الحقيقة اساس
والغريق دايما يتعلق بأشايه
والاعمى نفسه يبص فى مرايه
والجعان بيحلم أنه فى سوق العيش
ويصحى من النوم على ايه فى يده مافيش
ومشينا وراهم وبقالنا سنين ماشين
ونقول خلاص تعبنا يقولوا فاضل سنتين
مره نغمض عنينا ومره مش شايفين
ومره نقول على الله ومره نكون خايفين
ومره ننسى كلامهم ومره نسب الدين
ومره نزهق عليهم ومرات كتيره باللين
ومره نصرخ ننادى للعالم خليكوا شاهدين
تعالوا بصوا علينا بقينا كلنا مساكين

الناس دى ماشيه بأى سياسه وعلى أى كتاب
بيجروا وراهم البلد من خراب لخراب
وخلوا عيشة الغلابه متلغمطة بهباب
دأنا كل ما سمع كلام حد منهم أقوله أنت البعيد كداب
لو فيه ذاكره عندنا كنا سجلنا كل اقوالهم
ما احنا سكان البلد وعارفين كل أفعالهم
ياما غيبونا عن الوعى بلعب الكورة
واتصل على رقم وحل معانا فزورة
تكسب شقة وعربيه وميت الف جنيه
أتاريها نصب وضحك علينا البيه
ده غير الل بيتاجر فى دمنا وقوتنا
عاوز يعيش باشا ولو على حساب موتنا
وان حد فينا رفع صوته وقال ده حرام
يتشد
يتجر
يتهان
ويتحط فى بقه لجام
وكام سنه يقضيها فى السجون عريان
يعذبوه الكلاب وتاكل من راسه الغربان
يعنى على رأى المثل مافيش فايده
لغة الظلم والقهر فى البلد سايده
وبأيه يفيد الكلام وأحنا محلك سر
ماشين متسلسل ايدينا وبكل رجل نجر
سنين عشناها فى عذاب د غير كاسات المر
اللى شربناها من كلامهم وطلعت فى النهايه أوهام
وكلام الجرائد على لسانهم كله كلام فى كلام

مدير عام المنتدى

ماشين متسلسل ايدينا وبكل رجل نجر
سنين عشناها فى عذاب د غير كاسات المر
اللى شربناها من كلامهم وطلعت فى النهايه أوهام
وكلام الجرائد على لسانهم كله كلام فى كلام