كلام بالأدب

مدير عام المنتدى

قصيدة : كلام بلأدب
شعر : محمد ضباشه
-------------
كلام بالأدب بينى وبينك
لا فيه اهانه ولا تجريح
نقعد ونتفاهم سوى
أن كنت أبن بلد بصحيح
تسمعنى ويمكن ساعتها تفوق
وعاوزك ما تزعل كده وتروق
نحسبها بالعقل أنا وأنت
ما كل العيون باصة عليك أنت
وأوعى تقولىساعتها
اش جاب لجاب
لا أنت أتولدت اسد
ولا أنا أتولدت غراب
أنا وأنت فى البلد عايشين
وكل أهل البلد
على خراب مالطة أهم شاهدين
أول سؤال بسأله
فين حقى وحق كل الناس
خدوه بالقوه حشيتك
وأحنا تحت النعال ننداس
لحد أمتى هنبقى
عن الحقيقة غايبين
نصحى من نومنا
ومن الهم مش شايفين
ما ان الأوان اتسترلى يومين
وأنسى طابور العيش
علشان أجيب رغفين
وأداوى فى هدمتى
علشان عورتى ما تبان
ومن حق بنتى
فى العيد تجيب لها فستان
ومن حق ابويا وأخويا
وكل الآهل والخلان
يعيشوا زى الناس
ويلاقوا بلدنا أمان
ليه بس سرقتوا أحلامنا
واحنا أمناك
وخلناك تمشى قدمنا
ضيعتنا وضيعت منا أيامنا
وعيشتنا على أمل
طلع الوهم خدمنا
وكل مانمشى وراك
نلاقى فى النهايه سراب
وبدل ما تسكن بلدنا الملايكه
سكنها غراب وغراب
وياريته زن على خراب عشه
اتاريه وصولى وحقود
وكرهنا نبص فى وشه
سرقوا خزينه البلد
وسكنوا عمارات وقصور
وباقى خلق الله
على المقابر يروح ويغور
طب بينى وبينك
هما جابوها منين
فجأه الحظ رفعهم لفوق
ياراجل اصحى وفوق
ولا دة لعب الكبار
ولا الحكايه بقت قمار
وطربيزه وتلات ورقات
وأحنا نصيبنا كان سكات
ولا فاكرينا خراف ومعيز

نعم .... بتقول أيه
انا سامعك بقالى سنين
مش عاجبك كلامى
ما أنا بدأتها باللين
طب قولى
ايه زعلك منى
هو الجد وحش
يا ريت تفهم وتفهمنى
الناس خلاص غضبها
ملا عنيها
بعد ما شافوها خراب
ولا عاد حصوة ملح فى ايديها
حبستوهم ولعبتم بأقدارهم
وغيبتوهم عن الوعى
وهديتوا كل اسوارهم
أنا بس هفكرك
فين فلان وفلان
وكام عالم ومبدع
رمتوهم فريسة للسجان
وكام كاتب
وكام شاعر
وكام وطنى
فى البلد دى اتهان
وكام فارس جوادة قلم
كتب بيه يادوب كلمة
ونشرها مقاله
أو كتبها قصيدة
ولا طلعت فى الشريط غنوه
كان مصيرة زى أى أمين
ذل
مهانة
وأهانة
وكان مصيرهم فين
فوق يا أبن بلدى
خلاص طفح من قسوتك الكيل
وخايفين نصحى فى يوم
مانلاقى الهرم والنيل
-------------
نصف بلدنا بتموت
على رغيف العيش
بيدوروا فى جيوبهم
على أى عمله مافيش
وموظفين البلد من الجوع
يقدموا الخدمة ولازم البقشيش
وربع بلدنا التانى
لا طايل أرض ولا سما
بيكرة اللى فوق
واللى تحت زى العما
ما خلاص رسينا على طبقات
طبقة ولاد الحرام
وطبقة الأموات
وأبن الحرام ما خلى
لابن الحلال حاجة
وليه الخلق محتاجة
سرقتوها وماعاد حاجة
---------
وفين صحيح اللى وعدتنا بيه
هبشوه منك ولاد الآيه
مصانع
اراضى
قرى
والباقى نقديه
واحنا ولاد كلب
كبيرنا مالوش ديه
صدقنى العيب لافيك ولا فيه
العيب فى جهلنا
واللى غمضوا عنيه
ونسونا بالكوره والافلام
أيه هى القضية
وضاع عمرنا يوم ورا يوم
احنا فى سابع أرض
وغيرنا فى خير البلد بيعوم
---------
فاضل ربع البلد
اللى سرقوها بالكوسة
وخلو تلات ترباعنا
عايشين فى دى الحوسه
صحيح اللى له ظهر
ينام فى البلد شبعان
واللى بلا ظهر
عايش فى البلد تعبان
بيعدى يومه عليه
وهو ماشى يحسبها
ويضربها
ويقسمها
ويجمعها
وفى الأخر مافيش فايده
ونار الأسعار جوه البطون قايده
وياريت حتى تختشى على دمها
ولا تلاقى حد يلمها
ازاى بس تساوى الناس
اللى معاه مليار
زى اللى ماعنده مداس
هتقولى والدعم
اقولك سكر وسمنه وشاى
والوز
والبط
واللحمه
والكسوه
والعلاج
والسكن
والكهربا
والميه
وحاجات كتير اقولها باى
دول للمحسوبين بس
وانت ياغلبان اخرس هس
أنت عاوز تساوى راسك
براس البيه
طب لما يبقى جيبك فيه

وعاشوا الغلابة سنين وسنين
وكل ثانيه يموت مسكين
من الهم
من الفكر
من الجوع
من المرض
من قلة الحيله
وأنتم بكل أسف ساكتين
---------

مراقب عام

تحية طيبة
سيدي
لقد تطلعت لقصائدك الجميلة ، أعجبتني كونها تلتمس الواقع المعاش في مجتمعنا حاليا
سلمت يداك وقالمك المبدع
بارك الله فيك
احترماتي و تقديري
شريـــف

مدير عام المنتدى

اهلا بك أخ شريف نورت الموضوع وأتمنى ان تكون مرتاح بمنتدانا ولقد قرأت ما كتبت واعجبنى حقا ولكونى لم ابادر بالرد فهذا لصالحك الحين حتى يظهر اسمك بالشريط المتحرك للاعضاء نورت موضوعاتى ولك منى خالص التحية والتقدير

مدير عام المنتدى

فعلا كلام بالادب

» كلام في الحب
» كلام قوارير * الكــبــر *
» كلام من القلب الحزين~~
» كلام قوارير * تفحيش المجتمع *
» كلام قوارير * خطر الموت الجماعي *