رسالة من ميت

رساله من ميت
شعر : محمد ضباشه


جانى ابويا فى المنام
وقالى ليه حزين مهموم
وغضبان ليه من دنيتك
وبترمى على الزمن اللوم
أوعى تفتكر ان السعادة
فى شويه فلوس وهدوم
وان اللى فاكرهم أحسن
كل اللى حوشوه هيدوم
لما تجينا هتعرف
من اللى كان فى الثراء بيعوم
هيقولك ولا حاجة نفعت
وما غير وجة الكريم هيدوم

احسن حاجة تعملها
حوش لك شويه اصحاب
ينفعوك فى يوم شدتك
وتلقى اللى يفتح عليك الباب
ولا تفكر فى جاه وثراء
كل اللى جريوا وراهم خاب
واللى كان زى الشمس ظاهر
بقى كله تراب فى تراب

كن راضى يا أبنى بدنيتك
ومهما اخدت منها قليل
وكن قنوع وصابر
وأوعى ياخدك الحرام وتميل
صحيح الدنيا فانيه
وفيها ناس بوجة جميل
رموها ورا ضهرهم
واتحول عملهم داخل قبرهم قنديل

أصحى وقابل شمس النهار
وأمسح همومك فى توب الليل
وأحبس الطمع جواك
وقوم بعزيمة وشد الحيل
لا هتاخد اكتر من المكتوب
ولو خدته بالسرقة والتضليل
طب قولى ايه هيفيدك
الا العذاب والويل