تمام التمام

مدير عام المنتدى

تمام التمام
محمد ضباشه

كله يا أبنى ماشى
تمام التمام
لاعاد فيها سرقة
ولا تسأل هبشوا كام
ولجل دا عملنا أذاعة
عمك شلبى الهمام
ياله اظبط المحطة
واسمعنا وأياك تنام
نشرة الساعة تسعة
وشلبى بيقول سلام
أول أخبارها سودا
فى سكه كدب وضلام
وأفهموها بقى يا ناس
هو انتوا ناقصين علام

اللى أسمه ايه نضفها
وكله اصبح نظيف
والحرامى تاب وصلى
بس بيسرق خفيف
كام مليون بسيطة
والناس مش لاقيه الرغيف
واللى كان غلبان وحافى
وشكله اصلا ضعيف
مش مهم رصيدة كام
المهم دمه ظريف

وبتاع الاسكان ما خلع
وبعد ما نهبها بيحاسبوه
ما قعد سنين فى الوزارة
وأنتوا معاه بتحموه
الكرسى كان سنده
ولا اللى سنده أبوه
ولا انتوا حسيتوا فجأه
بعد ما بعتوه
ولا تصفيه حسابات
ولعنتوا اللى جابوه

وبتوع الحاجات التانيه
اللى واخدينا رايحين جاين
يلغوا ويعدلوا بمزاجهم
وكلنا ساكتين
يخرج بتاع
ويجى بتاع يشقلب الموازين
واللى كان مظبوط
يوسخوه فى الطين

هنا اذاعة شلبى الهمام
اللى نفسه مرة
يتعشى بجوز حمام
وليلته بتبقى سودا
وخناق ويا المدام
علشان نفسها راخرة
تطبخ مرة فى برام
أو تنور شمعة
تقتل خوف الظلام
أو تقعد ويا شلبى
فى جو كله غرام
أو تشرب حاجة ساقعة
مسكينه يا حرام
عيشتها بؤس خالص
وسابتنا وراحت تنام
وكل يوم حكايه
اتفرج يا سلام

احنا على الموجة سته
أيها المستمعين
ولو فصلوا الاشارة
احنا تانى راجعين
بأخبار جديده خالص
عن غزه وفلسطين
والضفة ورام الله
خليكوا قاعدين
وشوفوا ولاد الكلب
اللى عاشوا ساكتين
وبحور من الدم تغلى
وكلهم شايفين
ومشيوا ورا أمريكا
بيقولولها يا ماما أمين
احنا تحت أمرك
وأيه يعنى فلسطين

نلتقى بعد الفاصل
وهتعرف اللى حاصل
من اخبارنا المحليه
والبامية والملوخية
وحقن مسكنات
بس ما فيش خناقات
دول ناس بيحسبوها
انا مش بقول خربوها
واللى اسمة ايه غول
انا مقدرش اقول
واللى اسمه ايه طمعان
الحيطة ليها ودان
واللى اسمه ايه احتكارها
ماهو دا قدرها
واللى اسمه ايه ناوى
ما أنا عارف أبوه دا حاوى
واللى اسمه ايه حبسوه
لحظة وراجع ألووووووه
سميه من الزقازيق
الناس عايشه فى ضيق
كمال من الغربية
دى البلوه مداريه
سميرة من منوف
حلوه بقى حلوف
سارة من المعادى
باعونا لمين أه الأعادى
محمد من طنطا
كله كدب وأونطة
جرجس من باب اللوق
ياراجل خليها بالزوق
سعيد من الدراسه
وفين هى الحراسه
أحمد من الحسين
طب قولى قصدك مين
عربى من بور سعيد
ماله تانى الحديد
شادية من السويس
أه مه بقى عريس
كامل من العبور
بندعى معاك يغور
خالتى ام سيد من شربين
والله بقينا مساكين
ورده من الانبوطين
صحيح يا وردة راحوا فين
سماح من العباسية
شله اه حراميه
تفيده من بولاء
وعزه من الوراق
ادعوا يصيبهم بلاء

عــــــــــــــــــــــــــدنا
وقفلوا المحطة بتوع الضرايب
وانا فتحها النهاردة بس لجل الحبايب
والقصد مفهوم وطايب
ما حبل الوداد بينا بقى دايب
وان عبت اعيب على مين غير الشايب

مدير عام المنتدى

عــــــــــــــــــــــــــدنا
وقفلوا المحطة بتوع الضرايب
وانا فتحها النهاردة بس لجل الحبايب
والقصد مفهوم وطايب
ما حبل الوداد بينا بقى دايب
وان عبت اعيب على مين غير الشايب

نائب مدير المنتدى

على اسم مصر التاريخ يقدر يقول ما شاء
انا مصر عندي احب و اجمل الاشياء
بحبها و هي مالكة الأرض شرق و غرب
بحبها بعنف و برقة و على استحياء
بحبك يا مصر