أنتهى الدرس

مدير عام المنتدى

انتهى الدرس
محمد ضباشه

ماخلاص خلصت حصتنا
يا له يا قادة لموا الكراريس
وشاوروا على البقع الحمرا
زى دم حسن وموريس
سكان غزه المحتله
الشابة الامورة السمرا
اللى ضميركم مات ونساها
وحبستوا فى سماها القمرا
علشان لون الدم ما يظهر
وعلشان تداروا على مؤامرة

ايه رأى رجال الفكر
فى قضية ملطخها الدم
واحنا نمصمص فى شيفنا
وكلام فى كلام من الفم
أيه قطعتوا أيديكم
وما قادرين على الصهاينة
تشريد قتل دمار وخراب
وفضايح للعالم باينه
وصورة طفله دبحها الغدر
وهى ماشية وفى ايديها كتاب
بقع الدم على فستنها
فاضحة العدو والاحباب
اللى ما قدروا فى يوم يحموها
وسبوها لديابة وكلاب
ياكلوا من لحمها الطاهر
ولا خايفين من أى حساب

ياله يا قادة لموا الكراريس
الحصة الجاية على مين
فكر حزر فزر يمكن تعرف
الدور على مين بعد فلسطين
يمكن سوريا او لبنان
ويمكن مصر أو السودان
دة مخطط مكتوب من بدرى
لجل خيرنا ينهبوه
زى ماعملوا فى العراق
وفى الاخر صدام شنقوه
طب اعقلها انت براسك
وسيب الحصة وقطع كراسك
هى ناقصه تانى علام
ولسه هنقول يا سلام
ياله ياجدعان لموا رجالكم
وخلوا كرامتكم تقويكم
وعلموها ازاى تحترم العرب
وبعد الدرس هنحيكم
لحسن كل الشعب العربى
بالفم المليان قالوها عليكم
كام قمة وكام مؤتمر
وزى مارحتوا زى ما جيتوا

نجم جديد

مش عارف اقول اية نفسى استعير قصيدة من الكلام الجميل اللى انتة بتكتبة لكى انول الشرف بتلحينها بجد مفيش اروع من كدة مع تحياتى بدوام التفوق ارجو الافادة تحياتى الفنااااااااااااااااااان

مدير عام المنتدى

احمد حسنى فيه قصيدة اسمها زعلان كده ليه موجودة فى الديوان دى شعر غنائى ممكن تتلحن
وأى قصيدة مكتوب تحت عنوانها كلمات محمد ضباشه ممكن تتلحن ولكن القصائد اللى مكتوب تحت عنوانها شعر محمد ضباشه
صعب تلحينها لانى لم اضع لها لحنا وقت كتابتها فهى لغرض
معالجة مشكله فى قالب شعرى
صباحك فل