يا أبنى أخرج من وحدتك

يا أبنى اخرج من وحدتك
شعر : محمد ضباشه



يا ابنى أخرج من وحدتك
وكسر بيدك قضبان السكوت
وصحى صوتك بالصراخ
والكلام لحسن تموت
زى ما ماتت سنين من عمرنا
كانت خرسا ما ليها صوت
وشبنا معاها فى حبسها
وكأننا بلعنا الحوت
والايام كدا بتمر علينا
وكدا أو كدا هتفوت
ويبقى أحسن لو واجهنا
واستمرينا لآخر الشوط



مه مش هتفرق معانا
بس على الآقل نقول
للظالم كفاية ظلمك
بدل السكوت على طول
ولما أصواتنا تجلجل
هتصحى اللى عاش مسطول
وغايب عن الوعى
وتارك الديابة تطول
كسرات خبز الغلابة
وأمل حزين مخبول
وخلى الدنيا سودا
ومصير الشباب مجهول



ليه بس نسكت عليهم
وهمه فى البلد طايحين
لا سايبين حد فى حالة
ولخير البلد واكلين
واحنا أرتضينا الذل
ويتقال علينا مساكين
مع أننا أغنيا
ولكن عن حقنا ساكتين
اخرج يا أبنى من وحدتك
ونادى على السامعين
انا رايح اجيب حقنا
وأنتوا ورايا ساندين