محمد ضباشه
مدير عام المنتدى
 | | موضوع: أصحى يا مصر السبت يوليو 03, 2010 2:10 pm | |
| أصحى يا مصر
محمد ضباشه
اصحى يامصر فى يوم بدرى
وصحى ولادك النايمين
وصحى جواهم ضمايرهم
وعرفيهم معنى الصلاح والدين
واسقيهم ميه من نيلك
وحلفيهم بألف يمين
انهم يحافظوا على خيرك
ويرجعوا اللى نهبه غراب البين
هو وشله الفاسدين
اللى لسعدنا كارهين
واللى سرقوا منا بذور الامل
وخصخصوا الطرح فى البساتين
وماخلوا نسمة هوا صافية
ولا قمرا يعشقوها أثنين
ولا كلمة حرة تقول لا
ولا صرخة تقول يا مين
ياللى سجنتوا البلد
وحبستوا ناس مساكين
عايشين على عيش غرابك
وبيموتوا بعض بالسكاكين
فى طوابير طويله وعريضة
علشان يوفروا جنهين
حيطان بيوتهم ذل
وعكار شرابهم طين
وهمة عايشين على خيرك
ولا عيشة السلاطين
-----
أصحى يا مصر فى يوم بدرى
وألغى فكرة الطوابير
ودورى على ولادك الغلابة
اللى متاعهم خيش وحصير
واللى سمو نفسهم صفوه
وفاكرينا معيز وحمير
وحسبيهم وحسبينا بالورقة والقلم
يطلعوا اقل مننا بكتير
فى العدد بس لكن
عربياتهم من ماركة الخنازير
واحنا من قله الحيله نصوم
حتى فى شهر أمشير
تقدرى تقولى الفرق بينا
زى الكتابة بالقلم وكتابة الطباشير
أصحى يا مصر قى يوم بدرى
وكفاية نومك فى العسل
همة دايما محتاجين
منك حبة كسل
علشان ما تعرفى ايه بيجرى
ولا ايه منهم حصل
وأحنا طبعا متغمين
وبنجرى على شرشين بصل
وفجأه هوبا نبات شيطانى
نفوق نقول البيه وصل
وبعد حبه نلقاه وزير
ومش مهم انه فشل
المهم معاه بكاوى
وبالحصانة أتغسل
وأه فرصة نشوفة باشا
ولو يعارض يتفصل
اصحى يا مصر كفايه نوم
وكفاية اللى ضاع من عمرنا
احنا خبيتنا خيبة قوية
ولا انت خيبتك زينا
خايفة منهم وجاية تجرى
تستخبى ورا مننا
طب مش كفايه علينا همة
عيشونا فى غلبنا
ومش كفايه اللى خدوه
وحملوه على ظهرنا
وانت نايمة مش حاسة بيهم
لما باعوا لحمنا
واحنا كنا بنقول يا مصر
قداكى روحنا ودمنا
أصحى يا مصر فى يوم بدرى
وأدعى لنا وأنت بتصلى
وأدعى لهم بريح عاتيه
تاخدهم وما تخلى
الا ولادك الطيبين
اللى دمهم سكر ومتحلى
بأيمانهم برب الكون
ومعاه دايما فى تجلى
وخديه وخدى أمثاله
وخدى كمان اللى
كان السبب فى غلبنا
علشان أشفى فيه غلى
أصحى يا مصر فى يوم بدرى
ونادى على الواحد القهار
انه يرحمنا من قسوه الظالم
ومايشوفة تانى نهار
ويحجز له قصر فى جهنم
حيطانة موحوجه بالنار
وساعتها نشوف الاسد
والله ما حصل فار
وهو بيقول ارحمونى
انا كنت من الاصغار
وعملت زى اللى قالوا
كالحمار يحمل من دنيته اسفار | |
|
الطير المغرد
| | موضوع: رد: أصحى يا مصر السبت يوليو 03, 2010 3:50 pm | |
|   امتى شعب مصر يفوق من الغيبوبة دى وكل واحد يعرف حقه من حق غيره سلمت يداك استاذى الفاضل لك منى كل الشكرو التقدير الطير المغرد  | |
|
محمد ضباشه
مدير عام المنتدى
| | موضوع: رد: أصحى يا مصر السبت يوليو 03, 2010 4:12 pm | |
| الطير المغرد اهلا بكى والف مبروك على الترقية لنجم فضى وعقبال ترقيات اخرى
شكرا على مرورك
دمتى بكل خير | |
|
