الساعة كام ......؟
شعر : محمد ضباشه
-
الجمعة زى السبت
والحد شبة الخميس
والناس غضبانه خالص
م اللى اصبح عريس
وساكن فى القصر واحنا
يومنا أصبح كبيس
والناس وخلق ياما
ومحمد وعمى موريس
بيقولوا احنا الغلابة
ودمع العين حبيس
عرفنا اليوم نفرق
الطيب من الخبيث
عاوزين ناكل يا مرسى
أحسن ما نموت فطيس
-
الجمعة زى السبت
والاثنين وراه تلات
وحصاد حكومتنا طبعا
كوارث بالمئات
وقنديل سايبنا نلطم
ونصررررخ م الاهات
ونقول يا حيط دارينا
صبيان ويا البنات
ما كفاية العمر عدى
وما كلنا غير فتات
وشربنا ميه وسخه
ولبسنا من البلات
-
الجمعة زى السبت
وبعد بكرا اثنين
ووعود سمعتهالى
من سنه وأثنين
وحلقى لسه ناشف
وسلاسل فى الأيدين
وتقولى بكرا أحسن
يا عم بكرا فين
وأنت طابق فى حلقى
وهواك عامى العنين
اليك يارب نشكى
وأنت يارب المعين
-
الجمعة زى السبت
وأيام تجر أيام
عصرك زى اللى قبلك
كله مليان كلام
لكن عمرى ما هيأس
ولا أقول فى يوم حرام
مادام الحلم شوفته
وأنا نايم فى المنام
ووسادة تحت راسى
باين من ريش نعام
أن أنا جوه قصر
حيطانه من الرخام
والناس مبسوطة خالص
ومفيش على العيش زحام
وكل واحد فى شغله
والكل يقول تمام
وصحيت على مصر تقولى
يا أبنى الساعة كام
