خدها نصيحة

مدير عام المنتدى

خدها نصيحة
شعر : محمد ضباشه

خدها نصيحة واسمع منى
ياله يا شاطر روح نام
المسأله مش عاوزه حداقه
ولا حتى محتاجة علام
كل اللى سمعته أنساه
دى وظيفة ولا فى الاحلام
واللى قالوه اخوانا البعدا
والله يا أبنى كلام فى كلام
جاى لوحدك تبقى تروح
أو سمعنى هتدفع كام
ولو بالواسطة يبقى استنى
وعدى الدور وتعالى قدام
اهلا مرحبا بأبن الغالى
بكرا هتبقى معانا تمام

ياله الباقى خلصت فركش
انتوا كنتوا لسد الخانة
ولازم النشرة عن دى وظيفة
لكن الفايز عندى أمانة
قلنا ازاى يا سعادة البية
هى وظيفة ولا أهانه
ولما أنت عندك الفايز
ليه نصرف وبطونا جعانه
ولا الكوسة كبرت خالص
وعقولكم محتاجة صيانة
حتى لما نقول يا وظيفة
نلقى فيها بردوا خيانة
قالى يا أبنى صدقنى
دى أوامرجايه من فوق
روح وأهدى وطيب خاطرك
و شويه هتنسى وتروق
خليك هادى وتوكل
وفارقنا بالراحة وبالذوق
لحسن انت عارف الباقى
وعارف من ايه هتدوق

قول وانا ماشى جت
على بالى كلمة أبويا أتعلم
ما أتعلمت يا ابويا كفايه
ومن علمى ماشى وبتألم
رفضونى مع انى الآول
والعاشر خدها وما أتكلم
وأنت لامره عرفت وزير
ولا حتى لأمباشا تسلم
يبقى لازم اخرج من الصف
وألوى بوذى وأمشى مبلم