مبارك أيه اللى نسامحة

مبارك مين اللى نسامحه
محمد ضباشه

مبارك مين اللى نسامحه
بعد ماخلاها خراب ودمار
تلاتين سنه فى عهده البائد
حولها لطاوله ولعب قمار
لحاشية سماها رجاله
كانوا بالتحدى وبالأصرار
يقتلوا فينا كل طموحنا
وخلونا بعنا حيطان الدار
وبضحكته الواسعه البايخة
وبخطبه المليانه مرار
خلانا فى عهده نتبهدل
ونقول ياريس أستقرار
يقول لنا الخطة الجايه
وكل يوم نسمع أعزار
لما كرهنا طلوع الشمس
من البطاله ومن الأسعار
وقلة سكن وقلة حيلة
وفقر صابنا كالأعصار
ومرضى واقفه فى الطوابير
علشان علاج يطلع به قرار
وشباب يموت لما يهاجر
ونفسه يمسك حتى دينار
وعلشان رغيف طوابير ياما
وياما أتملت بنا الأخبار
وهو مش سامع شكوى
ولا فى الشتا شايف أمطار
ولا فى صيفنا كان يعرق
ولا فى الربيع بنشوف أزهار
واللى يحاول ينتقده
بقانون طوارىء وبأجبار
يكون مصيره السجن سنين
ويما فى سجونه شابت أعمار
كان هدفهم يغيروا مصر
ولهم تاريخ حافل بنضال
واللى زود طينه بله
هو وشلة ناس اشرار
من ضمنهم أبنه وريثه
على كام وزير عوزينها بوار
دبحونا وتاجروا فى دمائنا
وعيشونا على جمر النار
وهى دى اللعبه الوسخة
اللى وصمتهم وصمة عار
سرقة فلوسنا وأملاكنا
علشان يحوش كام مليار
وياريته صلح أحوالنا
وبالديمقراطيه نعيش احرار
ومصيبة تالته مظبطها
وبخطة فاشله رسمها حمار
فاكر بلدنا شخشيخة
يورثها جمال من ابوه بقرار
بماده يعدلها فى الدستور
وموافقه ياخدها باستهتار
من برلمان غاوى يجامل
وواخد الحكايه على طول بهزار
لما مصر بقت كرسى
عليه الملوك واحنا الأصغار
ولما قامت ثورتنا
كشفنا فيها كل الأسرار
وطلبنا برحيله نهائى
وكتبنا فيه حبة اشعار
أرحل كفايه علينا القهر
الشعب عاوز ناس أطهار
خلصت يا ريس أيامك
وهو دا أخر المشوار
فقعد يراوغ ويرتب
وقال اشاور كام سمسار
فيه أيه يحافظ على الكرسى
وعلى النظام أنه ينهار
فقام العدلى وقال ساعة
نضرب رصاصنا على الثوار
من خوفهم الكل هيجرى
وكام شهيد وجريح أه غار
وأختار لنفسه يكون قاتل
وبلاها كلام وبلاها حوار
وبلاها شعب يقول رأيه
لسنين طوال عاشوا فى حصار
بقانون طوارىء وبشرطة
تاخد أعتراف ومفيش انكار
وسجون دخلها احسن منه
ببطشه كان حاكم جبار
من العدل انه يتحاكم
بقانون طبيعى طالع له نهار
ومن العدل أنه يخش السجن
بمحاكمة واضحة وفيها اشهار
وتشوفه كل شعوب العالم
تنقلها ليهم حبة اقمار
ونقول مبارك دخل السجن
ودفع جزاء كل الأضرار